رسالة إلي من يهمة الأمر

رسالة إلي من يهمة الأمر

أكتب إليكي رسالتي دونا ً عن نساء العالم لعدة أسباب

ولكن قبل أن أقولها أردتك أن تتذكري معي

لتعودي معي لأجل لحظات العمر

1

أول يوم شوفتك فية

كنت دايما بهرب .. كل ما تقابلني مشكلة

وأحس إن الكون كلة بقي ضدي أجري أحجز تزكرة

و أسافر مش مهم فين ولا هغيب قد إية

المهم أبعد

وفي يوم كنت رايح أحجز تزكرة .. وشوفتك

أول كلمة قولتهالك لما جات عيني في عينك

إنتي كنتي فين ؟؟

هو حضرتك تعرفني

من زماااان من قبل ما أتولد

عمري ما هقدر أنسي إبتسامتك وقتها

مشيت وراكي كتيررر دوختيني من كتر اللف

ولما دخلتي الكافي بعتلك رقمي علي منديل

وسبتك ومشيت

2

أول مرة كلمتيني في التليفون

ألوووووو .. إنت أحمد

أيوة مين حضرتك

أنا ( فلانة ) إنت نسيتني

لأ بس حضرتك تعرفيني منين ؟

أنا اللي قابلتها النهاردة الصبح

هو إنتي .. إنتي بجد .. ياااااااااة أنا أكيد بحلم

3

أول يوم مسكت إيدك فية

كنا ماشيين في الشارع

بصيتلك وأنا كلي خجل وقولتلك

بصي بقي أنا همسك إيدك علشان أعديكي الشارع

بس في الحقيقة أنا مش همسكها علشان أعديكي

أنا همسكها لأني نفسي أحس بأيدك في إيدي

ساعتها بصيتيلي وحركتي إيدك وإنتي اللي مسكتي إيدي

إحساس جميل جدا عمري ما هنساة

4

أول يوم إعترفتلك فية بحبي

أحمد

نعم

هو إحنا بنتقابل لية ؟؟

علشان أنا بحبك جداااا

وسكتنا .. سكتنا كتيررررر

بس كنا بنتكلم من غير كلام

5

أول حلم حلمناة مع بعض

بص يا أحمد أنا نفسي لما نتجوز نخلف بنت زي القمر

أكيد هتكون زي القمر لو طلعت شبه مامتها

طيب نسميها إية

وفي نفس اللحظة أنا وإنتي قولنا نسميها حلا

6

يوم ما حصلتلي الحادثة

وجيتي تجري عليا وإنتي بتعيطي

مش قولتلك تاخد بالك وإنت بتسوق

كام مرة أقولك تبص قدامك وماتتكلمش في الموبايل

ونسيتي إن أهلي كلهم واقفين وماشوفتيش غيري

بوستيني ونزلت دمعة منك علي خدي

لغاية دلوقتي حاسس بيها

7

يوم م خرجت من المستشفي

لقيتك مستنياني

بس أول ما شوفتيني علي كرسي متحرك

إتغيرت نظرتك ليا حسيت إنك بتبصيلي بشفقة

كلة إلا إنتي

معقول الحب يتحول لعطف وشفقة

8

يوم ما سبتيني

غبتي عني أكتر من شهر ما بترديش عليا

ولما رجعتي .. قلتيلي كل حاجة قسمة ونصيب

بكل بساطة

===

علشان كدة بكتبلك مش علشان ألومك

أنا بكتب علشان أقولك

أنا إديتلك كل حاجة .. ولما مشيتي أخدتي كل حاجة

لدرجة إنك ما سيبتليش أي حاجة ممكن أبدأ بيها حياة تانية

كنتي كل حياتي .. دلوقتي ماليش حياة

بكتب علشان أقولك ربنا يوفقك معاة

ويقدر يحبك قد ما حبيتك

وما يزعلكيش عمرة وتتجوزا وتجيبوا بنت زي القمر

وتكون شبة مامتها

أما أنا .. بوعدك

أول ما هعرف أمشي هحجز تزكرة

و أهرب تاني

أحمد

الله الله عليك ياأحمد كلمات جميلة رقيقة معبرة بعد ما قرأت رسالتك شعرت انك صاحب هذة المشاعر الجميلة

سورى لم ارى رسالتك الا امبارح والف الحمد الله على سلامتك وعودة محمودة الى المنتدى بيتك الثانى فعلا

وننتظر منك كل جديد ان شاء الله

نسيت أقولك توقيعك رائع صورة عسل قوى

ربنا يخليكي يا قمر

فعلا دة بيتي التاني

وعايز أقولك إني أول ما حسيت إن الدنيا ضاقت بيا

جيت جري علي هنا

تقبلي تحياتي

جميييييييييييييييييييييل اخى استمر شعرم رائع تصفيق